,,Sigurður Kári borgaði ekki skólagjöld"

Mér þótti vænt um að sjá á síðum Fréttablaðsins 2. maí sl. að einhverjir framtaksamir menn skyldu minnast mín í kröfugöngunni sem blásið var til á baráttudegi verkalýðsins 1. maí.  Þar var birt mynd af kröfuspjaldi sem haldið var á lofti þennan dag, en á því stóð:

,,Sigurður Kári borgaði ekki skólagjöld"

Það er rétt hjá þeim ágætu mönnum sem höfðu fyrir því að útbúa þetta merka spjald og bera það í kröfugöngunni að ég greiddi ekki skólagjöld meðan ég stundaði nám við lagadeild Háskóla Íslands, enda innheimti skólinn ekki skólagjöld af nemendum sínum þá frekar en nú.  Það voru skattgreiðendur þessa lands sem greiddu þann kostnað sem hlaust af námi mínu sem ég nýt góðs af í dag.

Fyrir það er ég þakklátur og ég vona að þeir sem útbjuggu kröfuspjaldið góða og báru (sem ég geri ráð fyrir að séu nemendur við Háskóla Íslands) séu mér og öðrum skattgreiðendum jafn þakklátir nú fyrir að standa straum af þeim kosnaði sem hlýst af þeirra háskólanámi.

Í þessu sambandi finnst mér þó rétt að benda kröfuspjaldsberunum á að mín góða kona stundar nú MBA-nám við Háskólann í Reykjavík.

Skólagjöld vegna þess náms eru líklega þau hæstu sem þekkjast á Íslandi.

Þau greiðum við með glöðu geði af ráðstöfunarfé heimilisins.

Sigurður Kári.

Athugasemdir

[Gísli Tryggvason, 5.5.2008 kl. 20:43]

Við Sigurður Kári greiddum reyndar báðir skólagjöld - þó að þau hafi verið lægri en nú tíðkast eins og Sigurður Kári bendir á. Er ég kom heim frá framhaldsskóla- og háskólanámi, sem danska ríkið hafði bæði kostað og styrkt mig til, var svokallað skrásetningargjald reyndar þrefaldað með einfaldri ákvörðun menntamálaráðherra í kringum 1992, úr u.þ.b. 8.000 kr. ef ég man rétt í um 24.000 kr. en mig kann að misminna um nákvæmar tölur. Þetta - að háskólinn og ráðherra en ekki þjóðkjörnir þingmenn með lögum - ákvæðu að taka upp skólagjöld taldi ég ekki standast þá lögfræði sem ég var þá að læra. Undir það tók umboðsmaður Alþingis 1995 eftir kvörtun mína innan og utan háskólans. Tók Alþingi í kjölfarið lögmæta ákvörðun um að hækka skólagjöld með lögum um nákvæma fjárhæð þeirra þannig að ókjörnir opinberir starfsmenn gætu ekki hækkað þau með reikningskúnstum.