Til varnar menntamálaráðherra

Síðustu daga hefur mikið verið rætt um för Þorgerðar Katrínar Gunnarsdóttur, menntamálaráðherra, á Ólympíuleikana í Peking í Kína.  Einkum hefur verið rætt um síðari ferð Þorgerðar Katrínar til Peking sem hún fór gagngert til þess að vera viðstödd úrslitaleik Íslands og Frakklands í handknattleikskeppni leikanna.

Hefur Þorgerður legið undir ámæli úr ýmsum áttum vegna ákvörðunar sinnar að um að vera viðstödd leikinn, vegna þess kostnaðar sem til féll vegna ferðarinnar og fyrir að hafa tekið Guðmund Árnason, ráðuneytisstjóra í menntamálaráðuneytinu, og eiginmann sinn, Kristján Arason, fyrrum landsliðshetju og formann landsliðsnefndar Handknattleikssambands Íslands, með sér í ferðina.

x x x

Ég ræddi þessi mál stuttlega við Svandísi Svavarsdóttur, borgarfulltrúa Vinstri grænna, í þættinum Ísland í dag á Stöð 2 í kvöld.

Ég fylgdist líka með umræðum um þetta mál í Kastljósi Sjónvarpsins í kvöld þar sem þau tókust m.a. á um þetta mál, Jón Magnússon, þingmaður Frjálslynda flokksins, og Arnbjörg Sveinsdóttir, formaður þingflokks okkar sjálfstæðismanna.

Í þættinum lýsti Jón Magnússon þeirri skoðun sinni að ferð Þorgerðar Katrínar á úrslitaleikinn í Peking og það hvernig að henni hefði verið staðið væri hneyksli og að Þorgerður Katrín ætti að segja af sér.

Ég er ósammála Jóni Magnússyni, sem að mínu mati fór offari í Kastljóssþætti kvöldsins.

 Ferð Þorgerðar Katrínar á úrslitaleikinn í Peking er ekki hneyksli.  Og hún á ekki að segja af sér.

Þessa skoðun mína vil ég rökstyðja nánar.

x x x

Þorgerður Katrín var viðstödd setningu Ólympíuleikanna og fylgdi íslensku keppendunum, þar á meðal handknattleikslandsliðinu, fyrri hluta leikanna.  Hún sótti leikana sem menntamálaráðherra í ríkisstjórn Íslands.  Hún var því fulltrúi ríkisstjórnar Íslands á Ólympíuleikunum, enda ráðherra íþróttamála í ríkisstjórninni.

Ég er þeirrar skoðunar að eigi ráðherra íþróttamála að vera viðstaddur einhverja viðburði sem Íslendingar taka þátt í þá eru það Ólympíuleikarnir, enda eru þeir óumdeilanlega stærsti íþróttaviðburður veraldarinnar.  Tilgangur farar ráðherrans er auðvitað sá að sýna þátttakendum okkar á leikunum stuðning sinn og þeirrar stofnunar sem hún er í forystu fyrir.

Það má halda því fram að enginn eðlismunur sé á því að menntamálaráðherra styðji íslenskt íþróttafólk á erlendri grundu með þessum hætti og því þegar viðskiptaráðherra eða aðrir ráðherrar í ríkisstjórninni eða forseti Íslands ferðast til annarra landa til þess að efla viðskiptatengsl milli þeirra, íslenskum fyrirtækjum til hagsbóta.

Í báðum tilvikum eru þeir, í krafti stöðu sinnar, að sýna umbjóðendum sínum stuðning sinn.

Þegar menntamálaráðherra kom til Íslands frá Peking, hafði handboltalandsliðinu okkar gengið vel.  Það var hins vegar ekki fyrirséð þá að liðið kæmist alla leið í úrslitaleikinn á þessum stærsta íþróttaviðburði veraldar.

x x x

Ég tel að það hafi verið rétt ákvörðun hjá Þorgerði Katrínu að fara aftur á Ólympíuleikana í Peking þegar ljóst varð að Ísland myndi leika til úrslita í handbolta.

Öfugt við Jón Magnússon hefði ég talið það jaðra við hneyksli ef ráðherra íþróttamála hefði ekki verið viðstaddur þann viðburð.

Eins og komið hefur fram hefur jafn fámennt ríki og Ísland aldrei í sögunni átt keppnislið í úrslitum hópíþróttar á Ólympíuleikunum.  Afrek strákanna okkar að komast í úrslitaleikinn var stórkostlegt og vakti heimsathygli.  Úrslitaleikurinn við Frakka er stærsti íþróttaviðburðurinn í sögu þjóðarinnar hingað til.  Um það held ég að enginn deili og afrek strákanna okkar verður seint endurtekið.

Ég er þeirrar skoðunar að það sé skylda ráðherra íþróttamála á Íslandi að votta því landsliði sem nær þvílíkum árangri þá virðingu sína með því að vera viðstaddur slíkan atburð og undirstrika með því þá virðingu, þakklæti og stuðning sem afreksmennirnir eiga skilið frá þjóðinni.

Eigi ráðherra íþróttamála ekki að vera viðstaddur stærsta íþróttaviðburð í sögu þjóðarinnar, hvaða viðburð á hann þá að sækja?

x x x

Steingrímur J. Sigfússon, formaður Vinstri grænna, sagði í viðtali við Fréttablaðið í gær, miðvikudag, að ráðherrar ættu að sýna hófsemi þegar þeir mættu á atburði sem þessa.

Ég er sammála Steingrími um þetta.  Ráðherrar eins og aðrir eiga að sýna ráðdeild við meðferð á opinberu fé.

Ég gef mér og og geng út frá að það hafi menntamálaráðherra og yfirstjórn menntamálaráðuneytisins gert í þessu tilviki og ekki lagt út í meiri kostnað við þessa ferð Þorgerðar Katrínar en nauðsynlegt var.

x x x

Í því sambandi hefur vaknað sú spurning hvers vegna ráðuneytisstjóri menntamálaráðuneytisins þurfti að fara með Þorgerði Katrínu til Peking og vera viðstaddur úrslitaleik Íslands og Frakklands.

Ég hygg að þess þekkist varla dæmi æðstu ráðamenn þjóðarinnar fari í ferðir eins og þessar, einkum til fjarlægra landa, án þess að embættismenn þeirra eða aðstoðarmenn fylgi þeim.  Skiptir þar engu hvort um ráðherra í ríkisstjórn eða forseta Íslands er að ræða.  Raunar tel ég ljóst að þess þekkist heldur ekki dæmi í öðrum löndum.

Ástæður þess að embættismenn ráðamanna fara í slíkar ferðir eru auðvitað margvíslegar.

Í því sambandi verður að hafa í huga að í slíkum ferðum eru ráðmenn fulltrúar þjóðar sinnar og þurfa að sinna ýmsum skyldum sem embættismenn eru þeim innan handar við að uppfylla, auk þess sem upp geta komið ýmis atvik og vandamál sem kalla á að ráðherrar hafi aðstoðarmenn sér við hlið til að leysa úr þeim.

x x x

Í annan stað hafa vaknað spurningar um það hvort eðlilegt sé að ráðamenn taki maka sína með sér í ferðir sem þessar á kostnað ríkisins.

Sú spurning er eðlileg.  Eflaust kann svarið við þeirri spurningu að ráðast af því tilefni sem uppi er hverju sinni.

Ólafur Ragnar Grímsson, forseti Íslands og sérstakur verndari Íþrótta- og Ólympíusambands Íslands, fór á Ólympíuleikana í Peking til þess meðal annars að styðja við bakið á íslensku þátttakendunum á leikunum.

Með honum í för var eiginkona hans, Dorrit Moussaieff, forsetafrú.  Dorrit Moussaieff fór hvorki á Ólympíuleikana sem einn af ráðamönnum íslensku þjóðarinnar né sem sérstakur verndari Íþrótta- og Ólympíusambandsins.

Hún fór þangað sem maki forseta Íslands.

Og ég vil taka það sérstaklega fram að við það hef ég ekkert að athuga.

Ég geri ekki ráð fyrir að forsetafrúin hafi greitt fyrir ferðina á Ólympíuleikana, hótelgistingu eða annan kostnað sem til hefur fallið úr eigin vasa.

Og ég hef ekki orðið var við að Jón Magnússon eða aðrir hafi gert við það nokkrar einustu athugasemdir.

En ég fæ ekki séð að önnur sjónarmið ættu að gilda um maka forseta Íslands að þessu leyti og um maka annarra íslenskra ráðamanna, þar með talinn ráðherra íþróttamála í ríkisstjórn Íslands.

Það hefur ekkert með það að gera þó sá tiltekni maki, Kristján Arason, sé fyrrverandi landsliðsmaður í handknattleik og formaður landsliðsnefndar Handknattleikssambands Íslands.

För hans á Ólympíuleikana í Peking styðst við nákvæmlega sömu forsendur og för maka annarra ráðamanna íslensku þjóðarinnar á sömu leika.

x x x

Með hliðsjón af því sem að ofan greinir get ég hvorki tekið undir með Jón Magnússyni, þingmanni Frjálslynda flokksins, að för Þorgerðar Katrínar Gunnarsdóttur, menntamálaráðherra, á Ólympíuleikana í Peking sé hneyksli, né að hún ætti að segja af sér embætti vegna þess.

Slík krafa er að mínu mati einfaldlega fráleit.

Sigurður Kári.

Athugasemdir

[Jens Sigurjónsson, 29.8.2008 kl. 01:51]

Sæll Sigurður Kári.

Finnst þér þetta vera í lagi ?

Væri ekki nær fyrir ráðherrann að sýna fordæmi. Þegar talað er um að nú skuli allir landsmenn spara.

Ég get ekki séð að þetta sé gæta hófsemi.

Þessi seinni ferð hennar er ekkert annað en bruðl á allmannafé.

Sigurður ég vil ekki trúa því að þér finnist þetta bara vera í góðu lagi.

Bestu Kveðjur.

[DoctorE (IP-tala skráð) 29.8.2008 kl. 13:53]

Algert bruðl... hér er hlaupið á eftir öryrkjum og gamalmennum sem voga sér að reyna að vinna smá fyrir salti í grautinn... hér er börnum & öðrum úthýst af sjúkrastofnunum vegna fjáreklu
á meðan eruð þið stjórnmálamennirnir svífandi um heima og geima í snobbfílingu, virðist úr tengslum við allt og alla nema ykkur sjálfa.

Bottom line er að daman gat alveg horft á þetta í sjónvarpinu

[Darri (IP-tala skráð) 29.8.2008 kl. 14:04]

Það er allt í lagi að ráðuneytið borgi ferðir ef það er til peningur.

En er til peningur? 

Af hverju er hann þá ekki fyrst notaður til að borga fólki betri laun, og ráða fólk í skóla og frístundarheimili þar sem er mannekla. 

Mér finnst að ráðherra eigi að skammast sín að spreða svona peningum meðan ástandið í landinu er ekki betra. 

[ÖSSI, 29.8.2008 kl. 14:09]

Þarna er ég sammála Þér Sigurður Kári. Ef ekki á ólympíuleika þegar íslenskt lið er komið svo langt hvenær þá. Hvernig er það er enginn að gera athugasemdir við veru Forseta Íslands þarna úti og hans ferðalög í kring um leikana?

Mér finnst nú bara flott hjá þeim báðum að sýna stuðning í verki og láta sjá sig við þessar aðstæður og styð þetta heilshugar.

[Heimir (IP-tala skráð) 29.8.2008 kl. 14:09]

Sælir,

 Maki forseta Íslands gerir markt fyrir Íslenskt þjóðfélag og gegnir mikilvægu hlutverki.

Hinsvegar eru makar ráðherra (fyrir utan kannski forsetisráðherra) ekki að gera mikið fyrir land og þjóð. Það eru hreinlega eigin hagsmunir Þorgerðar sem skipta hér máli. Sjálfur hef ég ferðast á vegum ríkisstofnunar og ekki datt mér í hug að taka konu mína með.

Ég er ekki á móti því að Þorgerður og Guðmundur ráðuneytisstjóri hafa farið þessa ferð, en að við borgum fyrir maka þeirra er algert hneyksli.

Ekki geri ég ráð fyrir að þau hafi gist á stað þar sem verð telst "eðlilegt" þar sem heildarpakkinn hafi kostað 5 milljónir.

Ætlar hún að leika sama leikinn á Ólympíuleikum fatlaðra? Mér fyndist eðlilegt að hún færi á þá leika líka. En spurningin er, er það kannski ekki eins skemmtilegt að fara á þá leika?

[Sigurður Ingi Jónsson, 29.8.2008 kl. 14:14]

Ég heyri á fólki í kringum mig að skoðanir á þessum ferðum ÞKG eru skiptar. Sjálfum þykir mér vel í lagt að fara svona hópferðir með mökum, þá fleiri en eina eins og í þessu tilfelli. Reikningur til skattgreiðenda var allavega ansi ríflegur, en hann var þó ekki nema tíund af því sem gefið var til hreyfingarinnar í lok ferðar.

Hitt vil ég endilega vita. Undir hvaða tilfellum telur löglærður þingmaðurinn og nafni minn að kjörnir fulltrúar eigi að segja af sér?

Er það eingöngu bundið við lögbrot? Hversu alvarlegt þarf það þá að vera?

Hvað með siðferðisbresti? Er aldrei ástæða til að knýja á um afsögn kjörins fulltrúa fyrir að sólunda almannafé, fyrir misbeitingu valds, sérhygli eða sinna, svo fremi að gjörningurinn stangist ekki á við lög?

[Linda Björk Jóhannsdóttir (IP-tala skráð) 29.8.2008 kl. 15:02]

Ég bara spyr: Fyrst Þorgerður Katrín taldi að hún væri ómissandi þarna úti sem ráðherra íþróttamála, hvar var hún þá sem menntamálaráðherra þegar kjaradeilur kennara stóðu sem hæst síðast? Henni fannst hún greinilega ekki ómissandi þar því þá lét hún sig hverfa til Danmerkur og fannst að sveitastjórnir ættu að sjá um málin!!!!!!  Svona tvískinnungur er ekki til að auka virðingu mína á henni fremur en öðrum.

[Linda Björk Jóhannsdóttir (IP-tala skráð) 29.8.2008 kl. 15:05]

Og fyrst ég er á annað borð byrjuð að pirra mig á henni þá finnst mér að hún geti sjálf setið fyrir svörum um þessi mál en ekki látið aðra þrífa upp eftir sig skítinn.  Hún sást endalaust í sjónvarpinu meðan á leikunum stóð en nú heyrist ekkert til hennar.  Hefur hún eitthvað til að skammast sín fyrir? Já, bruðl á almannafé!!!

[Páll Kristjánsson (IP-tala skráð) 29.8.2008 kl. 15:06]

Hér grípur Sigurður Kári til sinnar landsþekktu röksemdafærslu, að svo skal böl bæta að benda á eitthvað annað.

Keep it up Siggi Kári

[Elli P (IP-tala skráð) 29.8.2008 kl. 15:11]

Ég held einhvern vegin að seinni ferðin hafi verið farin í þeim tilgangi að horfa á handboltaleik en ekki að sinna málefnum íþróttamála fyrir hönd Íslands.

Reyndar er vandséð að þessar 10 til 15 millj sem fóru í það að koma hástéttinni til og frá Kína hafi gagnast okkur á nokkurn hátt, og leiðinlegt að sjá þig verja þetta bruðl.......

[Einar (IP-tala skráð) 29.8.2008 kl. 15:34]

Ég get ekki séð að ráðherra íþróttamála hafi nokkuð á Ólympíuleika að gera hvað þá ráðuneytisstjóri.  Verður hún þá líka á Ólympíuleikum fatlaðra? 

[Erla Baldvinsdóttir (IP-tala skráð) 29.8.2008 kl. 15:38]

Látum vera að ráðherra menntamála mæti á leikana. Já og látum líka vera að hún taki maka sinn með sér..........En ráðuneytisstjóri og maki það þykir mér engan veginn boðlegt. Auðvitað er þetta taktlaust þegar almenningur er hvattur til aðhaldsemi þú hlýtur að sjá það Sigurður Kári!!

[Gisli Jens Snorrason (IP-tala skráð) 29.8.2008 kl. 16:04]

Þetta er hneyksli  og ekkert annað

[Sigurður Hólm (IP-tala skráð) 29.8.2008 kl. 16:23]

Sæll Sigurður, ég vil biðja þig og aðra pólítíkusa að setja ekki samasem merki á milli árangurs íþróttafólks og veru ykkar á viðkomandi kappleikjum,slíkt er ósmekklegt og óviðurkvæmilegt. Það er skömm að ykkur þegar þið reynið að nota eins frábæran árangur og íþróttafólks okkar ykkur til framdráttar, þetta fólk vinnur sína vinnu af hugsjón og eldmóð sem þið þekkið einungis af afspurn.

Það er skömm að því að þú reynir að draga þessa umræðu niðrá lágkúrulegt plan stjórnmála, gagnrýni sú sem sett er fram á menntamálaráðherra er fyllilega réttmæt á allan hátt en þú reynir aftur á móti að draga árangur íþróttafólksins sem tók þátt í þessum leikjum inní pólítíska drullusvaðs umræðu og hreykja þér og þínum flokki af þeirra árangri. Það er helber skömm af þér Sigurður og þér væri nær að sjá að þér og segja af þér þingmennsku sem og Menntamálaráðherra.

[Karl (IP-tala skráð) 29.8.2008 kl. 17:09]

"Ég gef mér og og geng út frá að það hafi menntamálaráðherra og yfirstjórn menntamálaráðuneytisins gert í þessu tilviki og ekki lagt út í meiri kostnað við þessa ferð Þorgerðar Katrínar en nauðsynlegt var."

Það er spurning hvað "nauðsynlegt" telst hjá ykkur stjórnmálamönnum nú til dags? seinni ferð ráðherra kostaði 2,1 milljón fyrir 2 nætur!

[Magnús Geir Guðmundsson, 29.8.2008 kl. 17:19]

Mörg er hér ádrepan og víst ekki alveg að ástæðulausu!

Og ekki bara vegna seinni ferðar menntama´laráðherra sérstaklega, heldur ekki síður vegna milljónanna fimmtíu, sem margir þinna eigin skoðanabræðra hafa leyft sér að gagnrýna og t.d. gripið til gamallar tuggu um !að menn eigi að borga fyrir sín áhugamál sjálfir" og þú hefur kannski einnig borið þér í munn einhvern tíman!? Því er ég ekki sammála, tel þessa peninga góða og táknræna viðurkenningu á þessum glæsta árangri handboltaliðsins, sem e.t.v. verður aldrei endurtekin.En seinni för menntamálaráðherra er allt annað mál og það verður að segjast sem er, að vörn þín fyrir henni er ekki góð og það sem meira er og aðeins er komið inn á hér víðar, hún er afskaplega óheppileg í ljósi allra aðstæðna. Samanburður þinn til að mynda við veru maka ráðherrans annars vegar og forsetans hins vegar, er til að mynda mjög hæpin og röklaus. Í fjölmiðlum hefur ekki annað verið hægt að skilja, en að forsetanum OG FRÚ hafi verið boðið af Íþrótta- og Olympíulandsliðinu til Kína auk þess sem þau eru líka á leið til nágranalands í öðrum óskildum erindagjörðum er koma OL ekkert við.Önnur atriði þín eru sömuleiðis mjög léttævg og raunar afskaplega kaldhæðnislegt að kjörin fulltrúi flokksins sem lengi flaggaði slagorðinu "Báknið burt" skuli reyna að halda uppi vörnum fyrir svona opinbera óþarfaeyðslu, þar sem já einmitt manni sýnist að viðkomandi ráðamaður hafi einmitt la´tið aðra en sjálfan sig "borga fyrir sitt eigið áhugamál"!

Hver kallaði anannars á að ráðherran færi aftur, almenningur? Alþingi? Ríkisstjórnin? Handboltalandsliðið?

Nei Sigurður minn, þá ákvörðun að menntamálaráðherran yrði að fara aftur til Kína, svo mikilvægt væri það að hneyksli teldist ella, tók Þorgerður Katrín Gunnarsdóttir sjálf og líkast til ein og þín orð bara tilbúin en máttlítil eftiráskýring til að verja vondan gjörning!

Og eins og fleiri benda á, er þetta alveg makalaust í ljósi orða sjálfs forsætisráðherrans og aðila vinnumarkaðarins líka um að nú þurfi virkilega að sýna aðhald og ráðdeildarsemi!

[Ingimundur H Hannesson (IP-tala skráð) 29.8.2008 kl. 18:19]

Ég verð að segja að miðað við núverandi ástand þá hef ég afskaplega takmarkaðan áhuga á því að taka þátt í því að borga þessa ferð fyrir aðila sem var með yfir 19 milljónir króna í tekjur á mánuði  í fyrra.

Fólk með slíkar tekjur á að borga fyrir sín áhugamál sjálft. Það þarf ég að gera með mínar aumu tekjur.

[Atvinnulaus eldri borgari (IP-tala skráð) 29.8.2008 kl. 18:46]

Er til nóg af peningum í landinu? Eiga ráðmenn þjóðarinnar einhvern rétt á að eyða þeim í skemmtireisur til Kína eða annarra landa? Mér sýnist að það megi nota þetta fé til annarra brýnni mála. Það er verið að skera niður þjónustu á sjúkrahúsum og víðar. Sumar starfsstéttir fá ekki viðunandi laun og býr við hungurmörk á meðan ráðherrar bruna á einkaþotum  í eina átt og SagaClass í aðra. Það er verið að eyða tugmilljónum í ferðaglaða ráðamenn en svo er bara öxlum yppt þegar beðið er um mannsæmandi laun. Ráðherrar sem geta ekki látið almenning ganga fyrir skemmtigleði sinni eiga einfaldlega að hætta (segja af sér). Þeir eru ekki starfi sínu vaxnir og hafa glatað trausti fólksins.

[Brjánn Guðjónsson, 29.8.2008 kl. 20:48]

úff, ég verð nú bara að segja að ég er algerlega sammála Sigurði Kára. mér þykja rök hans halda nokkuð vel og finnst þetta moldviðri vera píp og hystería.

annað hvort rekum við þetta opinbera batterí með þeim hefðum og venjum sem þar eru, eða ekki. ekki bara stundum svona og stundum hinsegin, eftir veðri og vindum.

[Sigurður Viktor Úlfarsson, 29.8.2008 kl. 22:30]

Það gilda ákveðnar samskiptareglur ýmist skrifaðar eða óskrifaðar í svona diplómatasamskiptum.  Sums staðar eru allir með makana og sums staðar ekki.  Ef Ólympíuleikarnir eru staður þar sem allir ráðherrar alls staðar úr heiminum taka makana sína með þá gerum við það líka.  Það væri mjög hallærislegt ef við tökum ekki fullan þátt. 

Því er við það að bæta að makarnir eru auðvitað á fullu í svona ferðum að "selja" landið og Kristján Arason auðvitað mjög verðugur fulltrúi þjóðarinnar á þeim vettvangi.  Það þarf enginn að segja mér að hann hafi setið með hendur í skauti í þessum ferðum.  Þjóðin þekkir hann af öðru. 

Minnsti hluti þessara ferða snýst um tímann á pöllunum rétt á meðan á leik stendur.

[Skeggi Skaftason, 29.8.2008 kl. 22:49]

Sigurður Viktor: "Minnsti hluti þessara ferða snýst um tímann á pöllunum rétt á meðan á leik stendur."

Ertu að grínast?  Seinni ferð ráðherrans snerist bara um að vera til staðar á pöllunum og fagna með leikmönnunum eftir leikinn. Við getum svo deilt um hvort það sé í lagi eða ekki, og hvort sé í lagi að kaupa flugmiða í þá ferð á ríflega 600 þúsund krónur á manninn. 

Sigurður Kári: "Í því sambandi verður að hafa í huga að í slíkum ferðum eru ráðmenn fulltrúar þjóðar sinnar og þurfa að sinna ýmsum skyldum sem embættismenn eru þeim innan handar við að uppfylla, auk þess sem upp geta komið ýmis atvik og vandamál sem kalla á að ráðherrar hafi aðstoðarmenn sér við hlið til að leysa úr þeim."

Hvaða skyldum hafði ráðherran að gegna í seinni Kínaferð sinni sem embættismaður þurfti til að uppfylla? Hvers konar vandamál gátu komið upp sem ráðherran hefði ekki getað leyst sjálfur? Ertu ekki bara að segja að okkar helstu fyrirmenni þurfi "einkaþjóna" til taks og geti ekki sjálft hringt á leigubíl eða farið í hraðbanka?

[Skeggi Skaftason, 29.8.2008 kl. 22:55]

Sigurður Kári: "Ráðherrar eins og aðrir eiga að sýna ráðdeild við meðferð á opinberu fé. Ég gef mér og og geng út frá að það hafi menntamálaráðherra og yfirstjórn menntamálaráðuneytisins gert í þessu tilviki og ekki lagt út í meiri kostnað við þessa ferð Þorgerðar Katrínar en nauðsynlegt var."

Flugmiðar á ríflega 600 þúsund krónur er fásinna, þó svo ferðin hafi verið fyrirvaralaus. Slíkt hlýtur að vera óumdeilt. Það má ganga úr skugga um það með að skoða t.d. vefinn www.dohop.com eða heimasíðu SAS flugfélagsins og um það skrifaði ég á bloggsíðu minni.

[Fengur (IP-tala skráð) 30.8.2008 kl. 00:06]

Þetta er nú meira talið á þeim sem kommenta hér. Það hefði einfaldlega verið hneiksli ef Þorgerður hefði ekki farið og sýnt okkar mönnum þann stuðning sem hún gerði. Að komast í úrslitaleik í liðaíþrótt á Ólympíuleikunum verðskuldar einfaldlega slíkt. Og hver hefði talað um að það hefði ekki átt að bjóða maka hennar með ef um væri að ræða karl-ráðherra og kvenkyns maka hans? Að makinn hefði átt að greiða fyrir ferðina sjálf? Það hefði enginn rætt um það. Og Kína, embættismannaveldi eins og það gerist mest, að Þorgerður hefði verið þar ein í för, án maka eða ráðuneytisstjóra? Þið eruð ekki með öllum mjalla sem haldið að þetta sé hneyksli.

Af hverju er ekki fjallað eins mikið um aðkomu Guðlaugs Þórs í veiði með Baugi í undanfara REI? Af hverju er ekki fjallað um Forsetan og maka hans sem dveljast langdvölum í Kína, fljúga fram og til baka milli Kína-Íslands og fer milliferðir og frestar einhverjum "ráðstefnum" sem hann á að fara til í Bangladesh? Er það kannski vegna þess að Þorgerður er kvenkyns en hinir karlkyns?

Margt annað mætti segja um kommentin sem hér er að finna en látum þetta duga í bili.

[áhugamaður um Kínaferðir (IP-tala skráð) 30.8.2008 kl. 00:07]

Mér finnst ótrúlegt að Ólafur Ragnar sæti ekki sömu gagnrýni og Þorgerður í þessu máli. Réttlæting ráðherra að fara er mun sterkari og meiri að fljúga heldur en hans - hún er íþróttamálaráðherra og hefur farið og fylgt landsliðum á marga leiki.

Ólafur flýgur heim frá Kína til að taka þátt í hátíðarhöldunum (hann gat alveg beðið til jóla með orðurnar) og fer svo strax aftur til Bangladesh. Forsetaskrifstofan gefur ekki upp kostnað fyrir hann og hans lið. Enginn er að tala um þá þögn eða að hann hefði kannski ekki átt að fara hem í 2 daga.

Ólafur flýgur alltaf með Dorrit. Öllum finnst það eðlilegt. Er ekki hræsni að gera aðrar kröfur um Kristján Arason. Er í lagi að kvenráðherra sé alltaf ein að ferðast en eðlilegt að karlráðherrar taki sínar konur? Látum þessa gagnrýni virka í báðar áttir.

Hvað hefði þjóðin sagt ef enginn væri þarna og við hefðum unnið gullið?

[Nonni (IP-tala skráð) 30.8.2008 kl. 10:17]

Forheimska almennings á Íslandi er yndisleg. Fólk talar um að markmiðið með ferðinni hafa ekki verið neitt annað en að horfa á einn handboltaleik, ekki til að vera hluti af fulltrúaliði Íslands. Þið látið þetta hljóma eins og hún hafi verið að skreppa upp á Skaga til að horfa á leikinn. Þetta ferðalag er 20 tímar hvor leið!!! Ég vorkenndi henni nú að vera að fara þangað til að sjá úrslitaleikinn þar sem það er ekkert grín að fljúga fram og til baka til Peking með nokkurra daga millibili. Amk veit ég það að mér þykir margt skemmtilegra en að hanga í flugvél allan liðslangan daginn.

Hættið þessu væli og öfundsýki og reynið að setja hlutina í samhengi. Hvað haldið þið að það sé langt þangað til að við spilum aftur úrslitaleik í handbolta á ólympíuleikunum? 20 ár? 30 ár? 70 ár? Það hefði verið hneyksli ef YFIRMAÐUR ÍÞRÓTTAMÁLA Á ÍSLANDI HEFÐI EKKI verið viðstaddur stærsta íþróttaviðburð í SÖGU Íslands.

[Ingileif R Vang (IP-tala skráð) 30.8.2008 kl. 11:09]

Hafa ráðherrar ekki rokið fyrir minna? 

Við erum svo oft að bera okkur saman við ønnur lønd, var ekki einn ráðherra 

Svía sem rauk fyrir minna?

kv Ingileif

[Árni Árnason, 30.8.2008 kl. 12:46]

Sæll Sigurður Kári, ég er þér hjartanlega sammála !! Þorgerður Katrín átti að sjálfsögðu að vera viðstödd úrslitaleikinn við erum að tala um mikilvæga stund í íþróttasögu lands og þjóðar. Það er með ólíkindum hvað það er til mikið af fólki sem er stútfullt af neikvæðni sem eru að rífa þessa frábæru stund niður í svaðið. Strákarnir okkar stóðu sig með sóma og lágmarkið var að ráðherra íþróttamála sýndi þeim hluttekningu fyrir vikið. Ég er ánægður með þig Sigurður Kári og ég gat ekki annað en brosað þegar þröngsýna Svandís sem hefur allt að hornum sér var nú ekki alveg eins hörð í málflutningi sínum í Ísland í dag þegar það var farið að ræða hótelgistinguna hjá Árna Þór Sig.

[Þórleifur M. Friðjónsson (IP-tala skráð) 30.8.2008 kl. 13:21]

Sæll Sigurður Kári !  Þakka þér ýmiss góð blogg að undan förnu. Hvað varðar ferðir Forseta og maka og ferð þorgerðar og maka, þá hef ég ekkert við það að athuga, hvort sem "kreppa" er eður ei. Þessir tveir aðilar EIGA að vera viðstaddir Olimpíuleika sem annars vegar verndari og ráðherre hins vegar. Þegar um er að ræða árangur sem "strákarnir okkar" náðu á mæting að vera skilyrði ekki undantekning. Bestu kveðjur.

[Tobbi (IP-tala skráð) 30.8.2008 kl. 13:47]

þetta væri ekki svona mikið mál er þetta skítapakk sem stjórnar þessu landi væri að eyða peningum í Heimilislausa og fátæka í stað þess að setja á stað nefndir sem skila eingu nema meiri peningum í vasan hjá þessum aulum. Svo eru menn í stjórnarandstöðuni að væla þeir myndu líka spreða eins og fjandinn sjálfur Fariði svo í rassgat

[Sigurður R. Þórarinsson (IP-tala skráð) 30.8.2008 kl. 16:18]

Að tala um gagnrýni og skítkast hvað þetta flandur á Þorgerði Katrínu á kostnað skattborgarans er bæði heimskulegt og óréttlátt.  Öllu sómakæru fólki svíður svona bruðl og helst er að sjá að hún hafi einhverja þörf fyrir að baða sig í ljósi "strákanna okkar"  Ef Þorgerður Katrín hefði haft snefil af sómatilfinningu hefði hún hvergi farið. Ein ferð er fyrigefanleg og jafnvel réttlætanleg en tvær, sveiattan  Hún er bara sjálfstæðismaður og alþjóð veit orðið hverju er von á frá þeim.

[Árni Gunnarsson, 30.8.2008 kl. 18:24]

Þetta er vandmeðfarið umræðuefni. Undir sýður gremja fólks út í ónýta stjórnmálamenn sem boða aðhald og sparnað fyrir þjóðina en fénýta sér ríkissjóð með bjánalegum risnugreiðslum, nokkurs konar sjálftöku úr félagsþjónustu pólitíkusa sem aldrei virðast vera efnahagslega sjálfbjarga, s.br. eftirlaunalögin illræmdu.

Ég hef margt bruðlið horft upp á hjá snobbliði þessu gegn um langa tíð. Flest hefur það valdið mér meiri óróa en þessar Kínaferðir Þ.K. sem ég hefði samþykkt hefði það verið borið undir mig. Í það minnsta ein ferð ásamt maka sem gegnir þar að auki forystustarfi fyrir HKÍ. Allt fram yfir það er svo umdeilanlegt.

Þessum glæsta árangri bar þjóðinni að fagna á verðugan hátt.

Óneitanlega hló nú í mér strákfjandinn samt þegar Ólafur Stefánsson stökk upp á vörubílinn og "gleymdi" að kyssa yfirstéttardömurnar sem biðu í eftirvæntingu. 

[Magnús Geir Guðmundsson, 30.8.2008 kl. 23:56]

Allir þeir sem bæði hér og annars staðar reyna að verja og réttlæta seinni för menttamálaráðherrans til Kína, eru léttvægir fundnir og lítt marktækir.Í raun er ekkert sem rökstyður þann samanburð og það er aumt að lesa þessar tilraunir til slíks.

Auðvitað getur fólk og hefur sannarlega skoðun á forsetaembættinu og þeim er því gegnir nú, en það kemur bara þessari ferð menntamálaráðherrans ekkert við og vera hans á leikunum ásamt sinni frú með allt öðrum og eðlilegri hætti! En jafnvel þó mætti tala um veru hans og kosnaðin þem að hlaust með gagnrýnum hætti, hefur þá allt í einu útúrsnúningurinn að "SVo skal böl bæta, að benda á annað verra", öðlast sannleiksgildi?

Hvernig væri nú að verjendur fararinnnar kæmu með einvher haldbær mótrök í raun og sann, í stað innihaldslausra vandlætingarupphrópana, sem ekkert gera annað en að veikja enn frekar málstað ráðherrans? En þau eru auðvitað engin og því grípa menn til svona ráða í reiði og örvæntingu.

[Emil Ólafsson (IP-tala skráð) 31.8.2008 kl. 00:41]

Ég er sammála því að Jón Magnússon þingmaður hafi farið algjöru offari í þessum þætti. Að sjálfsögðu er það skylda ráðherra Íþróttamála að vera viðstödd þegar Ísland er að keppa á Ólympíuleikunum og þetta er ALLS ENGIN ástæða til afsagnar.

Þorgerður Katrín hefur staðið sig með miklum sóma sem ráðherra og ég sem Íslendingur er stoltur af því að hún hafi verið í Peking til þess að styðja landsliðið, hún hefur alltaf gert það og mun alltaf vera stuðningsmaður landsliðsins.

Hvað finnst þér Jón Magnússon um að Dorrit forsetafrú hafi verið þarna ??? finnst þér að Ólafur Ragnar ætti að segja af sér ???? væntanlega ekki .... bara kominn tími til þess að þú haldir kj .......

 Með vinsemd og virðingu.

Emil Ólafsson

[Harpa Oddbjörnsdóttir, 31.8.2008 kl. 01:24]

Það er náttúrulega kjánlegt að kommenta á síðu manns sem þykist ekki þurfa að svara fyrir sínar færslur. Já ég er kjánaleg. ég hafði alveg trú á Sigurði, þrátt fyrir það að ég er ALLS EKKI í hans flokki, langt í frá jafnvel. En þegar hann reynir að verja gjörðir menntamálaráðherra(sem virðist ekki geta eða ætla að svara fyrir sig sjálf/ur) undanfarna daga missti ég allt álit á honum. SK finnst greinilega ekki skemmtilegt að þurfa að verja sínar skoðanir..... hmmmm

er það rétt hjá mer að ÞK hafi ekki látið heyra í sér varðandi þetta mál? Það er varla að ég trúi því en ég hef ekki heyrt eða séð neitt af henni eftir miðvikudaginn....

[Dagný (IP-tala skráð) 31.8.2008 kl. 04:52]

",Ég er þeirrar skoðunar að eigi ráðherra íþróttamála að vera viðstaddur einhverja viðburði sem Íslendingar taka þátt í þá eru það Ólympíuleikarnir,"

Á það líka við um ólympíuleika fatlaðra ? 

[Halla Rut , 31.8.2008 kl. 17:26]

Hvar er nú, hin sterka réttlætiskennd þín, og sú staðfesta sem þú fórst upp með, Sigurður minn, er þú byrjaðir í stjórnmálum.

Er tilgangur skrifa þinna hér, að verja frú Þorgerði, eða ertu að prjóna þér stól og sérð þetta sem tækifæri til að safna að þér garni?