Castro, kjarasamningar og þjóðnýting

Það er ástæða til að taka heilshugar undir með Geir H. Haarde, forsætisráðherra, um að aðilar vinnumarkaðarins eigi heiður skilinn fyrir ná saman um kaup og kjör á almennum vinnumarkaði með þeim hætti sem þeir hafa gert og kynnt hefur verið.

Í skrifum mínum á þessari heimasíðu hef ég viðrað þá skoðun mína að aðilar vinnumarkaðarins og samningamenn hins opinbera ættu í samningaviðræðum sínum að leggja áherslu á bæta kjör þeirra lægst launuðu, þeirra sem ekki hafa notið launaskriðs á síðustu árum og misserum þannig að þeir nytu forgangs umfram aðra varðandi kjarabætur.  Það er sérstakt ánægjuefni að aðilar vinnumarkaðarins skyldu fara þá leið við gerð nýundirritaðra kjarasamninga.

Hvað aðkomu ríkisstjórnarinnar að kjarasamningum þá get ég ekki annað en lýst ánægju minni með framgöngu hennar.  Ástæðan er sú að aðgerðir ríkisstjórnarinnar hafa það að markmiði að bæta kjör almennings í landinu með því að lækka skatta.  Það er sérstakt ánægjuefni.  Auðvitað geta menn haft mismunandi meiningar um hvort skynsamlegra sé að lækka persónuafslátt og minnka skerðingarmörk barna- og vaxtabóta eða lækka tekjuskattshlutfallið.  En aðalatriðið er það að með aðgerðum ríkisstjórnarinnar eru skattar á fólkið í landinu lækkaðir og því fagna ég.

Lækkun tekjuskatts á fyrirtæki úr 18% í 15% er aðgerð sem er mér mjög að skapi.  Ég hef lengi barist fyrir lækkun tekjuskatts á fyrirtæki og nú lítur slík lækkun dagsins ljós.  Lækkun tekjuskatts fyrirtækja er fyrirtækjunum mikilvæg.  Hún er til þess fallin að bæta afkomu þeirra og gerir rekstrarumhverfi þeirra hagstæðara en það var áður.  Það á að vera keppikefli þeirra sem starfa í stjórnmálum að tryggja sterkt atvinnulíf og öflug fyrirtæki, enda er ljóst að ef fyrirtækjum og atvinnulífinu gengur vel, gengur þjóðinni vel.  Lækkun tekjuskattsins skiptir þar miklu máli.  Sú aðgerð er líka skynsamleg við þær aðstæður sem nú ríkja í atvinnulífinu.  Fyrirtækin þurfa við slíkar aðstæður á innspýtingu eins og þessari að halda og hún sýnir að Sjálfstæðisflokkurinn og ríkisstjórnin stendur með atvinnulífinu.  Slík skilaboð ættu að vera atvinnulífinu mikilvæg.

Verkefni framtíðarinnar er síðan að lækka enn álögur á fólk og fyrirtæki með það að markmiði að gera rekstrarumhverfi þeirra enn hagfelldari, ekki einungis til þess að tryggja að þau fyrirtæki sem nú starfa hér á landi haldi starfsemi sinni hér áfram, heldur ekki síður til þess að laða fleiri fyrirtæki að landinu.

Það er verkefni framtíðarinnar.

x x x x x

Fidel Castro tilkynnti í gær að hann myndi láta af embætti forseta Kúbu eftir 49 ára langa valdatíð.

Afsögn Castros eru auðvitað heilmikil tíðindi í alþjóðastjórnmálunum, en ekki get ég sagt að ég sjái sérstaklega mikið eftir hinum kommúníska byltingarleiðtoga af vettvangi stjórnmálanna.  Sem einræðisherra á Kúbu hefur hann haldið þjóð sinni í herkví og kallað yfir hana gríðarlega fátækt og skelfingu.

Óvíst er hver tekur við stjórnartaumum á Kúbu við brotthvarf einræðisherrans eða hvort einhverjar horfur eru á breytingum þar í landi í kjölfar afsagnar Castros.

Eitt er þó víst að Kúbverjar eiga betra skilið en þá meðferð sem þeir hafa sætt af hálfu einræðisherrans og ógnarstjórnar hans síðustu fimm áratugi.

x x x x x

Nú stefnir allt í að Northern Rock bankinn í Bretlandi verði þjóðnýttur.  Breskir skattgreiðendur verða krafðir um litlar 3 til 4 þúsund milljarða króna vegna þjóðnýtingarinnar.

Þjóðnýting Northern Rock er auðvitað mikið áfall fyrir Breta og breskt fjármálalíf.  Það væri að minnsta kosti gríðarlegt áfall fyrir íslenskt fjármálalíf ef einhver viðskiptabankanna, sem fyrir tiltölulega skömmum tíma voru einkavæddir, yrðu þjóðnýttir á nýjan leik.

Vonandi mun slíkt aldrei gerast.

Í þessu sambandi má geta þess að Northern Rock bankinn hefur um margra ára skeið verið helsti stuðningsaðili knattspyrnuliðsins Newcastle United, en liðið ber merki bankans á búningum sínum.

Spurning er hvort breyting verði þar á eftir þjóðnýtinguna.  Það væri að minnsta kosti dálítið kúnstugt að sjá ríkið auglýsa á búningum liðsins í framtíðinni.  Það væri álíka fáránlegt og ef Íbúðarlánasjóður auglýsti á búningum Knattspyrnufélagsins Fram.

Sigurður Kári.

Athugasemdir

[Bjarni Kjartansson, 20.2.2008 kl. 12:01]

Minn kæri.

Aðeins að bankakrísunni í Tjallalandi.

Það var óborganlegur skemmtiþáttur með tveimur spéfuglum um einmitt þetta. ÞEir voru að tala saman um málið og var það gersamlega sársaukafullt, hve nákvæm lýsing þar var fram sett um hvert reikningurinn fyrir ofurbull flottræflana er sendur, það er ----beint til ríkissjóða þ.e. heim til Litlu Gunnu og Litla Jóns.

Íbúðalánasjóður SKAL VERA Í RÍKISEIGU OG REKSTRI og allsekki má þar í fikta. Þeim sem dytti það í hug, fremdi pólitískt sjálfsmorð nokkurskonar Harakírí.

Miðbæjaríhaldið

Þjóðlegur að vanda.

[Kristján Sigurður Kristjánsson, 20.2.2008 kl. 22:13]

1. Hvað segir háttvirtur þingmaður um að allir skattar fari niður í 15%. Efnahagsráðgjafi Regans fullyrðir að það munu styrkja ríkissjóð?

2. Hvað finnst hvþm. um að ríkisvald sé flutt til félagasamtaka? ( Eftirlitsvald Lögmannafélag Íslands og Félag fasteignasala ofl.)

3. Hvernig stenst skylduaðild að lífeyrissjóðum 74. gr. sts. í huga hvþm.? Er það ekki takmörkun á félagafrelsi að vera neyddur í eitt félag frekar annað í ljósi þess að fjárráðum manna eru þá takmörk sett til að leggja fé sitt til lags við aðra? Er það ekki brot á jafnræðisreglunni að alþingismönnum og hæstafréttadómurum sé gert með lögum að komast undan þessari skyldu? (2. mgr. 1. gr l. nr. 141/2003)

Með virðingu

[Jóhannes Ragnarsson, 20.2.2008 kl. 22:28]

Að maður sé að borga mönnum eins og þér, Siguður Kári, kaup með heilmiklum sköttum af litlum tekjum, tekur eiginlega út yfir allan þjófabálk. Pistilnefnan eftir þig hér að ofan sannar, svo ekki verður um villst, að þú ættir segja af þér þingmennsku þegar í stað og reyna fyrir þér til sjós eða í fiskvinnslu og sjá til hvort þú mannaðist eitthvað eilítið.

[Valsól (IP-tala skráð) 20.2.2008 kl. 23:55]

Þú Sigurður Kári átt þakkir skydar fyrir að vera eini hægri maðurinn hérna á blogginu sem ekki ritskoðar athugasemdir sem berast. Það kemur mér alltaf jafn mikið á óvart að fólk skuli yfir höfuð ekki þola gagnrýni á skoðanir sínar hérna á vefnum, og þá er ég eins og fyrr segir að tala um hægri menn og líka þá sem eru kristnir, þeir gera mikið að því að ritskoða athugasemdir eða útiloka menn vegna þess að þeir fá á sig gagnrýni og þola það ekki. En þú færð hrós dagsins fyrir að vera eini hægri maðurnn á blogginu sem ekki ritskoðar athugasemdir.

En ein tvær spurningar hef ég til þín, hvers vegna er ykkur Sjálfstæðismönnum svo umhugað um að gefa þær eigur sem fólkið í landinu á, og er ég þar að tala um fiskinn annars vegar og vatnið okkar hins vegar, og er það vegna þess að þið fáið svo mikla peninga inn í kosningasjóði flokksins frá auðmönnum, eða hafa auðmenn á Íslandi einhver önnur ítök í floknum sem verða þess valdandi að þið þingmenn Sjálfstæðisflokksins ákveðið að gæta frekar hagsmuna þeirra auðmannanna frekar en hagsmuna fólksins í landinu? Ekki koma með svar eins og samkeppni og þvílíkt, það hefur engin samkeppni orðið á bankamarkaði, og ekki hefur samkeppni orðið á símamarkaði, svo ekki koma með samkeppnis bull shit, segðu frekar hvers vegna þið gefið eigur þjóðarinnar fáum útvöldum? 

[Úlfur (IP-tala skráð) 21.2.2008 kl. 13:48]

Núna 20 febrúar, í spurningatíma breska þingsins, lagði Gordon Brown mikla áherslu á það að N.Rock héldi áfram að vera "commercial", og því yrðu upplýsingar um stöðu hans alls ekki gerðar opinberar skv. breskum upplýsingalögum. Sem veldur því að skattgreiðendur hafa engar forsendur til að meta það hvort ríkisstjórnin er að steypa þeim í skuldir vegna fyrirtækis í vonlausri stöðu eða ekki. Þetta er að sjálfsögðu yfirklór hjá Brown, og enn eitt dæmið um aumkvunarverða frammistöðu hans í embætti.

Hætta er á því að Northern Rock verði eins konar einkabanki Labour eftir þetta. Við þetta bætist að Newcastle og nágrenni eru mikið vígi hjá Labour, (t.d. er David Miliband þingmaður á svæðinu) og ef ríkisstjórnin bregður fæti fyrir hið mjög svo dýrkaða knattspyrnulið staðarins, beint eða óbeint, skýtur hún sig í fótinn. Það er því mjög augljóst að hinn pólitískt skuldbundni Northern Rock mun halda áfram að styðja Newcastle United. Og ef til vill mörg önnur félög sem Labour er nauðsynlegt að lifi af, hvort sem um er að ræða fótboltafélög eða aðra starfsemi. Á kostnað skattgreiðenda.

En varðandi óeðlilegan stuðning ríkisvalds við fyrirtæki tel ég að þú ættir að líta þér nær, Sigurður, og hafa í huga þær heimildir sem m.a. flokkur þinn (sem er alltof langt til vinstri að mínu mati) gaf á sínum tíma framkvæmdavaldinu til að veita einkafyrirtækinu DeCode 20 milljarða ríkisábyrgð. Það var að mínu mati með öllu óverjandi.