Stelpurnar okkar!

Stelpurnar í kvennalandsliði Íslands í knattspyrnu stóðu sig afspyrnuvel í gær þegar þær sigruðu Serba 5-0 og fylgdu þar með eftir góðum sigri á landsliði Frakka.  Árangur íslenska kvennalandsliðsins er frábær og vonandi halda þær áfram að gera það gott.  Þá er aldrei að vita nema við komumst loksins í úrslit í lokakeppni í knattspyrnu og að konurnar verði fyrstar til þess að ná þeim árangri.

Fyrir mína parta finnst mér ekki síst gaman að sjá hversu fær þjálfari íslenska liðsins er.  Sá heitir Sigurður Ragnar Eyjólfsson, fyrrum Víkingur og KR-ingur, og gamall skólabróðir minn úr Hólabrekkuskóla í Breiðholti.  Á yngri árum háðum við marga hildi á fótboltavellinum.  Hann var teknískur sóknarmaður.  Ég var harðskeyttur varnarmaður og minningin segir mér að oftast hafi ég haft hann undir, a.m.k. kýs ég að túlka söguna með þeim hætti.  Ekki vissi ég að Siggi Raggi gæti þjálfað þegar hann var ráðinn landsliðsþjálfari kvenna, en hann er að sýna það núna hversu miklar töggur eru í honum.

Kvennaboltinn á Íslandi hefur fram til þessa ekki verið sérstaklega hátt skrifaður og þar af leiðandi hefur hann ekki hlotið mikla athygli.  Samt sem áður hef ég tekið eftir því að Ásthildur Helgadóttir og Margrét Lára og allar hinar stelpurnar í landsliðinu hafa vaðið eld og brennistein til þess að markaðssetja kvennaboltann og íslenska landsliðið.  Ég man t.d. eftir auglýsingum þeirra um árið þegar landsliðskonur klæddust ýmsum búningum í auglýsingum fyrir leiki í von um að glæða aðsóknina.

Þessi uppátæki landsliðskvenna hafa hægt og sígandi skapað stemmingu innan liðsins og utan og í gær gerðist það að tæplega 6000 áhorfendur lögðu leið sína í Laugardalinn til þess að berja þær augum og styðja við bakið á þeim, u.þ.b. 100% fleiri áhorfendur en áður hafa sést á landsleik kvenna á Íslandi.  Slík mæting þætti góð á leiki karlalandsliðsins.

Stelpurnar í landsliðinu eiga auðvitað heiður skilinn fyrir frábæra frammistöðu inni á vellinum.  En þær eiga ekki síður heiður skilinn fyrir það hversu vel þær hafa staðið að því að markaðssetja sjálfar sig og sína íþrótt í gegnum tíðina.

Sú mikla vinna þeirra hefur skilað árangri og það sýndi sig í gær.

Sigurður Kári.

 

Athugasemdir

[Ingibjörg Hinriksdóttir, 23.6.2007 kl. 09:37]

Sæll Sigurður Kári,

þetta eru athyglisverðar pælingar hjá þér. Ég sé það alveg fyrir mér þegar Siggi Raggi er að reyna klobba Sigga Kára í Hólabrekkuskóla í gamla daga og eitthvað segir mér að það hafi tekist oftar en þig rekur minni til. 

En hvað um það. Málið er stelpurnar í boltanum. Það er alveg rétt hjá þér að stelpurnar allar hafa lagt sig mikið fram um að markaðsetja sig og sína íþrótt. Hver og ein þeirra hefur lagt í pottinn og árangurinn hefur oftar en ekki verið stórglæsilegar auglýsingar sem hafa vakið mikla athygli fyrir leiki þeirra. Það kom þó fyrir að mér fannst auglýsingarnar vekja meiri athygli heldur en leikur þeirra sem þær spiluðu hverju sinni. En eins og stjórnmálamenn vita þá er næstum öll umfjöllun góð, það átti svo sannarlega við hjá stelpunum og áhorfendum fjölgaði í kjölfarið. Þar með var ákveðinn sigur unninn.

Fyrir leikinn gegn Serbum birtist auglýsing sem var til þess ætluð að vekja athygli á því að stelpurnar í landsliðinu eiga sér þann draum að komast í úrslitakeppni EM í Finnlandi 2009. Sú auglýsing var ákaflega vel unnin og vakti sjálfsagt mikla athygli en besta auglýsingin sem þær hafa lagt til fram til þessa er sigurinn á Frökkum. Með honum opnuðu stelpurnar nýjan heim, með sigrinum áttu þær ekki lengur einar þann draum að komast í úrslitakeppni EM heldur einnig íslenska þjóðin. Þess vegna mættu tæplega 6.000 Íslendingar á völlinn því það er ekki síður þeirra draumur er að komast í úrslitakeppni stórmóts.

En það er ekki einu sinni kominn hálfleikur. Stelpurnar hafa leikið 3 leiki af 8. Þær eiga eftir þrjá erfiða útileiki, gegn Slóvenum í haust, Serbum næsta vor og þær leika gegn Frökkum ytra í lokaleik riðilsins. Sá leikur gæti orðið úrslitaleikur um það hvort Ísland vinni riðilinn og komist þannig beint í úrslitakeppnina. Þegar sá leikur fer fram á ég mér þann draum að full flugvél af Íslendingum fari til Frakklands til að styðja við bakið á stelpunum okkar og tryggja Íslandi sæti í úrslitakeppni EM í knattspyrnu. Það gæti verið stórkostleg stund.

[Gunnar Kr., 23.6.2007 kl. 15:15]

Jú, jú. Heiður og heiður. Auðvitað er þetta frábært hjá þeim, en af hverju í ósköpunum fá þær aðeins 20% af því sem strákarnir fá greitt? Eru allir svona samstíga í því að viðhalda kynbundnum launamun? Og hvers vegna í ósköpunum? Svari því, þeir sem geta.

Þær sigruðu aumingja Serbana feitt,

með sexþúsund manns inn' á velli.

En af hverju fá þær bar' örlítið greitt?

Því þær eru ekki með neina... (góða kostunarsamninga?)

                                   GKS

[Frelsisson (IP-tala skráð) 26.6.2007 kl. 03:13]

Er þessi launamunur ekki eðlilegur þar sem munurinn á vinsældum er gríðarlegur? Ég veit það ekki, ég velti því líka fyrir mér...