Farsælu og árangursríku ríkisstjórnarsamstarfi lokið

Í dag tilkynntu formenn stjórnarflokkanna, Geir H. Haarde, formaður Sjálfstæðisflokksins, og Jón Sigurðsson, formaður Framsóknarflokksins, þá sameiginlegu niðurstöðu sína að ekki væru forsendur til þess að halda samstarfi flokkanna í ríkisstjórn áfram.

Þar með lauk farsælu samstarfi þessara stjórnmálaflokka sem staðið hefur samfleytt í tólf ár.

Um það verður ekki deilt að ríkisstjórnir Sjálfstæðisflokks og Framsóknarflokks náðu gríðarlegum árangri á flestum sviðum.  Efnahagslegur uppgangur á valdatíma þessara flokka var ævintýralegur, kaupmáttur jókst um 75%, skattar á einstaklinga á fyrirtæki og einstaklinga voru lækkaðir meira en áður þekktist, bylting varð í menntamálum og svo mætti lengi telja.  Í stuttu máli urðu ótrúlegar breytingar á íslensku samfélagi undir stjórn þessara flokka.

Nú er hún hins vegar komin á leiðarenda.  Ástæða þess er ekki sá að málefnaágreiningur hafi ríkt á milli flokkanna sem leiddi til þessarar niðurstöðu, heldur þær pólitísku aðstæður sem upp komu eftir kosningarnar á laugardag.  Þar tapaði Framsóknarflokkurinn gríðarlega miklu fylgi og tæplega helmingi þingsæta sinna.  Þó ríkisstjórnin hefði haldið velli, var ljóst að meirihlutinn væri svo naumur að óskynsamlegt væri að halda samstarfinu áfram.

Sjálfstæðisflokkurinn getur verið stoltur af verkum þessarar ríkisstjórnar síðustu 12 árin, enda veitti flokkurinn henni forystu stærsta hluta þess tímabils.  Framsóknarflokkurinn getur einnig verið stoltur af verkum hennar.

Ég verð hins vegar að segja að ég varð fyrir verulegum vonbrigðum með viðbrögð Guðna Ágústssonar, landbúnaðarráðherra og varaformanns Framsóknarflokksins, við þeim tíðindum að formaður Sjálfstæðisflokksins hefði ákveðið að ganga til stjórnarmyndunarviðræðna við formann Samfylkingarinnar eftir að örlög núverandi ríkisstjórnar voru ráðin.

Í viðtali í Kastljósi Sjónarpsins sagði Guðni að samstarf Sjálfstæðisflokks og Framsóknarflokks hefði endað með gríðarlegum trúnaðarbresti og sagði að Njála og sjálfur Mörður Valgarðsson bliknuðu í þeim mikla hildarleik sem hann taldi að hefði átt sér stað milli okkar sjálfstæðismanna og Samfylkingarinnar og að ný ríkisstjórn hefði verið mynduð fyrir kosningar.  Með öðrum orðum var Guðni að segja að við sjálfstæðismenn hefðum setið að svikráðum gagnvart Framsóknarflokknum.

Ummæli Guðna um samstarfsmenn sína til 12 ára eru hvorki stórmannleg né drengileg.  Sjálfstæðisflokkurinn kom heiðarlega fram gagnvart Framsóknarflokknum í þessum viðræðum og þótti mörgum formaður Sjálfstæðiisflokksins jafnvel sýna Guðna og félögum full mikið langlundargeð í viðræðunum.

Staðreyndin er einfaldlega sú að það er einungis ein skýring á því hvers vegna formenn stjórnarflokkanna komust að þeirri sameiginlegu niðurstöðu að binda enda á samstarfið og hún er sú að niðurstaða kosninganna var Framsóknarflokknum gríðarlega óhagstæð og það stórsá á flokknum eftir kosningar.

Það er líka ómaklegt að halda því fram að Geir H. Haarde hafi átt í stjórnarmyndunarviðræðum við fleiri en Framsóknarmenn meðan á þeim viðræðum stóð.  Auðvitað veit Guðni, sem er ekki fæddur í gær í pólitík, að ýmsir menn og konur stinga saman nefjum við þær aðstæður sem skapast strax í kjölfar kosninga.  Allar slíkar viðræður eru hins vegar hvorki bindandi né formlegar.  Og meira að segja Framsóknarflokkurinn átti í slíkum viðræðum, því Guðjón Arnar Kristjánsson, formaður Frjálslynda flokksins upplýsti í fréttum Stöðvar 2 í kvöld að hann hefði átt í viðræðum við Framsóknarflokkinn meðan á viðræðum sjálfstæðismanna og framsóknarmanna stóð.  Sjálfstæðisflokkurinn átti enga aðild að þeim viðræðum.

Guðni Ágústsson og félagar hans í Framsóknarflokknum hafa enga ástæðu til þess að kvarta yfir framferði sjálfstæðismanna í þeirra garð frá því að flokkanir mynduðu ríkisstjórn árið 1995.  Nánast allan þann tíma naut Framsóknarflokkurinn frekar samstarfsins við Sjálfstæðisflokkinn en hitt.  Framsóknarflokkurinn fékk til að mynda jafnmörg ráðuneyti í ríkisstjórninni nánast allan þennan tíma þrátt fyrir að hafa mun minna fylgi á bak við sig.  Þá má ekki gleyma því að sjálfstæðismenn sættu sig við það að formaður Framsóknarflokksins, Halldór Ásgrímsson, settist í stól forsætisráðherra, í stað Davíðs Oddssonar, á kjörtímabilinu þrátt fyrir að Sjálfstæðisflokkurinn væri leiðandi í stjórnarsamstarfinu.  Þar fyrir utan studdum við sjálfstæðismenn þétt við bakið á ráðherrum Framsóknarflokksins í flestum ef ekki öllum þeirra málum á þessum kjörtímabilum.  Öllu þessu virtist varaformaður Framsóknarflokksins hafa gleymt þegar hann gaf í skyn að sjálfstæðismenn hefðu setið á svikráðum gagnvart framsóknarmönnum og gerst sekir um gríðarlegan trúnaðarbrest.

Hið fornkveðna segir að sjaldan launi kálfurinn ofeldið.  Ummæli Guðna Ágústssonar í kvöld í garð sinna samstarfsmanna í rúman áratug sanna það.

Því miður.

Sigurður Kári.

Athugasemdir

[Inga Lára Helgadóttir, 17.5.2007 kl. 23:54]

Ég átti ekki til orð að heyra hvernig maðurinn talaði, hvað er eiginlega að honum Sigurður Kári ? Er hann svona rosalega tapsár ? fór þetta alveg með hann eða hvað er þetta eiginlega ? svakalega varð ég fyrir miklum vonbrigðum með hann og mér fannst hann gera lítið úr sjálfum sér.

Kveðja Inga 

[Rögnvaldur Hreiðarsson, 18.5.2007 kl. 00:38]

Sérstaklega ósmekklegt hjá Guðna. Framsóknarmenn ættu frekar að þakka það traust og þann skilining sem sjálfstæðismenn sýndu þeim í þrengingum sínum við formannsskiptin og reyndar oftar. Mér hefur fundist Jón formaður komast sérlega vel frá þessum slæma skellli flokksins. Hefur viljað horfa inná við og leita skýringa þar en ekki grípa til ódýrra skýringa. Mín tilgáta er á þann veg að hér séum við að sjá Guðna í formannsslag í sínum flokki.

Hefði að öðru leiti ekki orðað þetta mikið betur sjálfur.

[Björg F (IP-tala skráð) 18.5.2007 kl. 01:23]

Þarna er ég sammála þér Kári. Maðurinn er greinilega tapsár eða að undirbúa sig fyrir að setjast í stjórnarandstöðu og er að þykjast vera óvinur ykkar til að vinna sínum flokk aftur fylgi frá vinstri vængnum. Guðni er eldra en tvævetur í pólitík svo ég hallast frekar að því seinna.. Hann nefnilega veit nákvæmlega hvernig pólitík er og hagar sér eftir því..

[haraldurhar, 18.5.2007 kl. 01:44]

Sigurður Kári nú eru breittir tímar í vændum, og þú aðrir Sjálfstæðismenn fá frelsi til að tjá sig í orðum og gerðum, og meira segja fylgja sannfæringu sinni. Eg er næsta viss að Geir losi um það helsi sem hefur verið á þér og mörgum flokksfélögum þínu, og leyfi ykkur að hafa málfrelsi og skoðanafrelsi.  Tími tilskipana og einræðis er liðinn undir lok og Sjálfstæðisflokkurinn geti farið að starfa í anda sinnar stefnu.

    Hættu nú að tala um kaupmáttaraukninguna, og snúðu þér að staðreyndum. Efnahagsmálinn eru afarerfið, og til að forðast harða lendingu þurfa menn að koma út úr skápnum, og fara leysa þau mál á vitrænum grundvelli, ekki á nótunum ég er fallegastur klárastur og langbestur.  þu getur jafnvel farið að talum um hvort nægi ekki að hafa einn Seðalabankastjóra, og kannski skipa í stjórn Seðlabankans fólks sem hefur kunnáttu og reynslu af stjórn efnahagsmála.

    Viðbrögð Guðna komu mér ekki á óvart, hagaði ser nákvæmlega eins og hann á að sér að vera. Guðni hefur ekkert til að bera til að vera ráðherra, og hefur sýnt það á undanförnum árum.  Þetta hefur mörgum verið ljóst og ekki síst samflokksmönnum hans, og svik hans við Halldór á Þingvöllum, þar sem Halldór tilkynnti að hann og varaformaðurinn ætluðu að stíga til hliðar´lýsa honum best.  Sa sem ætlaði að taka við framsóknarflokknum, tók ekki í mál að koma til starfa nema Guðni viki.   Jón Sigurðsson sem að mínu mati hefur staðið sig afarvel, hefur ekki átt sjö dagana sæla að þurfa glíma við Guðna.    Það kæmi mér ekki á óvart að ein af ástæðunum á slitum stjórnarviðræðna Geirs og Jóns, hafi verið að ekki væri pláss fyrir Guðna í næstu ríkisstjórn.

[Sigfús Þ. Sigmundsson, 18.5.2007 kl. 13:46]

Þessi viðbrögð Framsóknarmann eru með ólíkindum.  Í raun óskiljanleg.  Veit t.d. ekki betur en Jón Sigurðsson hafi sagt það strax eftir kosningar að nú væri lýðræðislegast að Framsókn stigi til hliðar og leyfði öðrum flokkum að mynda stjórn.  Hvað gerist svo?

[Bryndís Guðmundsdóttir (Binna), 18.5.2007 kl. 19:03]

Það er nú það eðlilegasta í stöðunni að þessir tveir flokkar ræði saman. Enda fylgi mest hjá þeim. Þetta kemur alltaf upp þegar flokkar detta út (fá ekki að vera með lengur í sandkassanum góða) sárir og reiðir. Enda er mannfólkið þannig úr garði gert. Ekki það að mig langi neitt sérstaklega að fá samfylkinguna með sjálfstæðinu. Enda tel ég betra að fá samfylkinguna með sjálfstæðinu ef að hægt er að koma í veg fyrir að Frú Ingibjörg S. verði forsætisráðherra, og það með V, B og Finu.

[Birna Dis Vilbertsdóttir (IP-tala skráð) 22.5.2007 kl. 19:48]

Sæll. Sá enga gestabók hjá þér. Rosalega er Labradorhvolpurinn þinn mikið krútt. Hvar er hann gamall, hvað heitir hann og hvaðan er hann?Kveðja Birna Dís

[Rúna Guðfinnsdóttir, 22.5.2007 kl. 20:27]

Framsókn er fall fararheill að þessu sinni!