Sjálfstæðisflokkurinn vill bæta hag eldri borgara

Frá því að Sjálfstæðisflokkurinn tók við stjórn landsins árið 1991 hefur orðið bylting á Íslandi.  Fyrir þeirri byltingu finna allir þjóðfélagshópar í þeim tækifærum sem þeim standa til boða hvort sem er í efnahags- og atvinnumálum, menntamálum eða velferðarmálum.  Fólk finnur líka fyrir því í buddum sínum því á þessu tímabili hefur hagsæld aukist samkvæmt öllum mælikvörðum, skattar hafa lækkað og laun á sama tíma hækkað.  Við höfum gripið til aðgerða til þess að lækka matarverð og svo lengi mætti telja.
En þó svo að sá árangur sem náðst hefur sé í senn glæsilegur og ánægjulegur er ekki þar með sagt að Sjálfstæðisflokkurinn vilji láta staðar numið og vilji ekki gera betur.  Þvert á móti viljum við halda áfram og höfum því sett fram metnaðarfull markmið á öllum sviðum.

Eldri borgarar og afnám eignaskatts

Um fátt hefur verið meira rætt í aðdraganda þessara kosninga en um málefni aldraðra.  Það er sama við hvern ég hef talað, allir leggja þunga áherslu á að bæta þurfi kjör hinna eldri, einkum þess hóps eldri borgara sem lakast eru settir.  Þessar áherslur koma ekki eingöngu fram hjá eldri borgurum, heldur ekki síður hjá fólki á mínum aldri, enda á það að vera sérstakt markmið hinna yngri að vinna að velferð þeirra eldri.  Þeir eiga það skilið enda hafa þeir skilað sínu framlagi til þjóðfélagins með glæsilegum hætti og við af yngri kynslóðinni njótum nú ávaxta þeirrar vinnu.

Hagur eldri borgara vænkaðist verulega á síðsta kjörtímabili þegar elsti skattur Íslandssögunnar, eignaskatturinn, var afnuminn.  Eignaskatturinn, sem átti rætur sínar að rekja til tíundarinnar gömlu, var ósanngjarn og óréttmætur skattur, en hann var jafnframt einstaklega þungbær eldri borgurum, enda voru eldri borgarar þeir sem helst urðu fyrir þeirri skattheimtu.  Afnám eignaskattsins var því mikill sigur fyrir eldri borgara.

Sigur fyrir eldri borgara

Enn stærri sigur vannst í kjarabaráttu eldri borgara þegar Geir H. Haarde, forsætisráðherra og formaður Sjálfstæðisflokksins, lýsti því yfir á landsfundi flokksins nýverið að á næsta kjörtímabili myndi Sjálfstæðisflokkurinn leggja sérstaka áherslu á bæta kjör eldri borgara, það er að segja að grípa til sérstakra aðgerða til þess að auka ráðstöfunarfé þessa hóps.  Og hvað er það sem Sjálfstæðisflokkurinn ætlar að gera til þess að ná þessum markmiðum?

Hvað ætlum við að gera?

Í fyrsta lagi ætlum við að minnka skerðingar á lífeyrisgreiðslum frá almannatryggingakerfinu.  Slíkt er nauðsynlegt til þess að ná fram kjarabótum fyrir eldri borgara.  Í annan stað viljum við tryggja öllum lágmarkslífeyri úr lífeyrissjóði til viðbótar þeim greiðslum sem koma úr almannatryggingakerfinu, enda státa því miður ekki allir eldri borgarar af digrum lífeyrissjóðum sem þeir geta leitað í að lokinni starfsævi sinni.  Hefur formaður Sjálfstæðisflokksins nefnt að slíkar viðbótargreiðslur gætu numið 25.000 krónum á mánuði.  Í þriðja lagi viljum við sjálfstæðismenn beita okkur fyrir því að fólk sem er komið yfir sjötugt geti unnið launaða vinnu án þess að það skerði lífeyri frá Tryggingastofnun ríkisins eins og nú er.  Slík breyting er mikið réttlætismál.  Í stað þess að vera sjálfkrafa dæmdir út af vinnumarkaði myndi slík breyting hvetja eldri borgara til áframhaldandi þátttöku í atvinnulífinu og til þess að gera sig áfram gildandi í samfélaginu með okkur sem yngri erum.

Kjósum Sjálfstæðisflokkinn!

Sjálfstæðisflokkurinn hefur búið svo um hnútana að efnahagslegar forsendur eru til þess að ráðast í þessar aðgerðir.  Þær eru metnaðarfullar og ábyrgar.  Þær sýna að Sjálfstæðisflokkurinn og eldri borgarar eiga samleið.  Við munum standa við þessi loforð verði okkur áfram treyst fyrir forystuhlutverki í landsstjórninni.  Eina leiðin til að tryggja að markmiðin náist er sú að kjósa Sjálfstæðisflokkinn í komandi kosningum.

Sigurður Kári Kristjánsson,
þingmaður Sjálfstæðisflokksins í Reykjavík.

Greinin birtist í Vesturbæjarblaðinu.

Athugasemdir

[Páll Einarsson, 10.5.2007 kl. 10:57]

Ég er ánægður að þið viljið bæta hag eldriborgara, vandinn er samt sá að þið hafið haft 16 ár til þess og lítið hefur verið gert.

Samt ánægður að eldri borgarar séu allt í einu áhugamál ykkar í sjálfstæðisflokknum. Hefðuð átt að láta verkin fylgja viljanum.

En þið þurfið samt ekki að hafa áhyggjur að þurfa að standa við það að gera e-ð fyrir eldri borgara þar sem ný ríkisstjórn mun taka við eftir næstu kosningar.

kveðja.

[Bjarni Kjartansson, 10.5.2007 kl. 13:15]

Hef lengi talið, að okkar ímyndamenn hafi algerlega kúkað uppá bak í þessu máli sem og mörgum öðrum.

Dæmi: 

Samfylkingarmenn básúna nú út svonefnda biðlista.  Húsnæðisvanda BUGLS og ,,greiningar biðlista"  allt uppdiktað að mestu. 

1.  Yfirmennirnir sem haft var viðtal við, eru flestir á lista eða í starfi fyrir Samfó.

2.  Grunnur hefur nú þegar verið tekinn að nýbyggingu BUGLs.  Auðveldasta mál í heimi, að benda fréttamönnum á, að fara nú með myndavélarnar og filma þessar framkvæmdir og inna svo þetta blessaða fólk eftir því, af hvaða hvötum svona hálfsannleikur er fluttur af embættismönnum ríkisins (yfirmenn á stofnunum nefnast embættismenn)

 Aldraðir eru uppistaða þess hóps ferðamanna, sem eru á Kanaríeyjunum eftir árámót, að ekki sé nú talað um golfferðirnar til Florida.

Helvíti illa farið með þennann hóp.

Auðvitað þarf að aðstoða gamalt fólk sem er heils´lítið og með aðstæður sem eru slakar EN það þarf ekki að láta þannig líta út, að allir sem ná ákveðnum aldri, þurfi að fá laun fyrir það.  Þeir sem ekki þurfa á slíku að halda EIGA ekki að fá BÆTUR  lesist bætur fyrir það sem vantar uppá framfærslu.

Sama á auðvitða við um öryrkjana, það á ekki að vera lögmál, að ef menn greinast með örorku, beri þeim laun fyrir það eitt.  Ef launatekjur eða aðrar tekjur eru nægar, á ekki að greiða BÆTUR. 

Miðbæjaríhaldið

[Ingibjörg Stefánsdóttir, 10.5.2007 kl. 15:07]

Nú er það? Af hverju hafið þið ekki gert það fyrr?