Falleinkunn Samfylkingarinnar!

Í síðustu viku skrifaði ég grein í Fréttablaðið undir fyrirsögninni ,,Við erum í fremstu röð í menntamálum."  Greinina má lesa á þessari heimasíðu, en í henni leiðrétti ég ýmsar rangfærslur sem frambjóðendur Samfylkingarinnar hafa haldið á lofti í kosningabaráttunni.  Hafa þar farið fremst í flokki sjálfur varaformaður Samfylkingarinnar, Ágúst Ólafur Ágústsson, og Katrín Júlíusdóttir, alþingiskona, sem bæði hafa tekið upp á því nýverið að ræða og skrifa um menntamál.

Allt frá því að ég tók sæti á Alþingi árið 2003 hef ég átt sæti í menntamálanefnd Alþingis og er formaður nefndarinnar.  Af þeirri ástæðu hef ég fengið tækifæri til þess að kynna mér þennan málaflokk vel og tekið virkan þátt í umræðu um hann innan þings sem utan.

Þess vegna fagna ég því þegar nýtt fólk blandar sér í umræður um menntamál.  Ég verð þó að gera þá játningu að gjarnan hefði ég viljað sjá þetta ágæta fólk blanda sér í umræður um menntamál fyrr á þessu kjörtímabili, en mér hefur þótt heldur lítið fara fyrir þeim Ágústi Ólafi og Katrínu á þessu sviði þar til nú skömmu fyrir kosningar.

Fram til þessa hefur málflutningur frambjóðenda Samfylkingarinnar verið mjög á einn veg, þann að íslenska menntakerfið sé aftarlega á merinni og að í raun sé allt í kalda koli í menntamálum.  Af þeim ástæðum sagði ég í niðurlagi greinar minnar:

,,Það er dapurlegt að sjá hvernig Samfylkingin reynir að gera lítið úr þeim stórmerkilega árangri sem hér hefur náðst í menntamálum á síðustu árum með villandi talnabrellum og hreinum rangfærslum.  Staðreyndirnar tala hins vegar sínu máli. Þær segja okkur svart á hvítu að við erum í fremstu röð í menntamálum. Hér hefur orðið bylting og hún blasir við öllum.  Það færi Samfylkingunni betur að viðurkenna að svo sé, frekar en að grípa til þeirra áróðursaðferða sem hér hefur verið líst.  Þær eru hvorki Samfylkingunni né menntakerfinu til framdráttar."

Það eru auðvitað ekki hægt að sitja undir þeim málflutningi Samfylkingarinnar að menntamál á Íslandi séu í ólestri og málaflokkurinn sé endalaust talaður niður af hálfu frambjóðenda hennar.  Slíkt er hvorki Samfylkingunni né menntakerfinu til framdráttar.

Í dag sýna þau Ágúst Ólafur og Katrín mér þann heiður að svara áðurnefndri grein minni í Fréttablaðinu.  Að sjálfsögðu mun ég svara þeim á sama vettvangi.  Hins vegar vekur athygli að Samfylkingin er enn við sama heygarðshornið.  Það þarf ekki nema að lesa fyrirsögn greinarinnar ,,Falleinkunn í menntamálum" til þess að átta sig á því á hvaða vegferð Samfylkingin er í þessum kosningum.  Það á að reyna með öllum tiltækum ráðum að sannfæra kjósendur um að Sjálfstæðisflokkurinn hafi skilið eftir sig sviðna jörð þegar kemur að menntamálum.

Ekki trúi ég því að kjósendur kaupi þennan málflutning því allir sem hafa fylgst með þróun menntakerfisins og uppbyggingu þess sjá hvers konar bylting hefur átt sér stað á þeim vettvangi undir stjórn Sjálfstæðisflokksins.

Í því sambandi er ástæða til að minna á eftirfarandi:

- Aldrei hafa eins margir Íslendingar aflað sér menntunar og nú.

- Fjárframlög til menntamála hafa vaxið stórkostlega á síðustu árum.  Ekkert ríki ver eins háu hlutfalli vergrar landsframleiðslu til menntamála og Íslendingar samkvæmt tölum frá OECD.

-  Framlög til símenntunar og ýmissa annarra menntunarúrræða fyrir fullorðna hafa stóraukist.

-  Frá árinu 1995 hefur háskólanemum fjölgað úr 7.500 í um 17.000.  Þar af hefur fjöldi háskólanema í meistara- og doktorsnámi tuttugufaldast.

-  Árið 1995 voru háskólastofnanir 3, en eru nú 8.

-  Samkeppni milli háskóla hefur verið innleidd.

-  Fjárframlög til vísinda- og tækniþróunar á Íslandi hafa vaxið gríðarlega og eru nú með þeim hæstu sem þekkjast, nú síðast með samningi ríkisins og Háskóla Íslands.

-  Lánasjóður íslenskra námsmanna hefur aldrei staðið betur og endurgreiðslubyrði námslána var lækkuð úr 4,75% í 3,75%.

-  Ný rammalöggjöf um háskóla hafa tekið gildi þar sem sérstök áhersla er lögð á gæðamat í háskólanámi.

-  Löggjöf um grunnskóla hefur verið breytt.  Fjármunir fylgja munu nú fylgja barni í öllum sveitarfélögum sem auka mun jafnræði barna og leysa úr læðingi krafta einkaframtaksins í skólakerfinu í anda Hjallastefnu Margrétar Pálu.

-  Heildartími náms í grunnskóla hefur aukist.

-  97% nemenda sem nú ljúka grunnskólanámi hefja nám í framhaldsskóla.

-  Frelsi framhaldsskólans hefur aukist og sjálfstæði þeirra verið eflt.  Námsleiðum hefur fjölgað og skólarnir geta nú boðið upp á nám til stúdentsprófs frá tveimur árum til fjögurra.

Þessi listi gæti auðvitað verið miklu lengri.  Hann sýnir svo ekki verður um villst hvers konar grettistaki hefur verið lyft á undanförnum árum í menntakerfinu undir stjórn Sjálfstæðisflokksins.

Ég hef ekki trú á því að almenningur sé sammála frambjóðendum Samfylkingarinnar, þeim Ágústi Ólafi Ágústssyni og Katrínu Júlíusdóttur, sem nú riðjast allt í einu fram á ritvöllinn og gefa menntakerfinu sína falleinkunn.  Þeirra einkunnargjöf lýsir annað hvort vanþekkingu þeirra á þeirri miklu uppbyggingu sem átt hefur sér stað í menntakerfinu eða þau tala gegn betri vitund.  Mér finnst líklegra að almenningur gefi þeim sjálfum falleinkunn fyrir framgöngu sína í umræðum um menntamálum.

Málflutningur Samfylkingarinnar ber þess heldur ekki merki að þeirra frambjóðendur beri mikla virðingu fyrir því uppbyggingarstarfi sem þúsundir starfsmanna menntakerfisins hafa unnið að á síðustu árum hér á landi.

Þann 6. desember sl. sagði Ingibjörg Sólrún Gísladóttir, formaður Samfylkingarinnar, á fundi flokksins í Keflavík:

,,Vandi Samfylkingarinnar liggur í því að kjósendur þora ekki að treysta þingflokknum."

Ágúst Ólafur Ágústsson og Katrín Júlíusdóttir eru hluti af þeim þingflokki sem þarna var lýst.

Kjósendur ættu ekki að treysta þeim fullyrðingum sem frá þeim hafa komið á síðustu vikum.

Sigurður Kári.

Athugasemdir

[Lilja Haralds (IP-tala skráð) 8.5.2007 kl. 15:22]

Ég held ég hljóti að búa á annarri plánetu en þú, Hrafnkell.  Jafnvel í öðru sólkerfi.

[Arnar Guðjónsson (IP-tala skráð) 8.5.2007 kl. 18:01]

Mikið svakalega virka þetta smeðjuleg og örvæntingarfull skrif. Það þarf ekki kjarneðlisfræðing til að sjá að menntakerfið á Íslandi er fáránlegt og sérstaklega ekki fyrir fjölksyldufók að stand í námi á Íslandi (nema að vera undir verndarvæng ríkra ættingja). Afhverju flýja svona margir til hinna Norðurlandanna í nám? Vegna þess að þar ríkir fjölskyldu- og barnvænt kerfi þar sem þessi ógeðslega græðgis- og efnishyggjustefna sjálfstæðisflokksins er ekki ríkjandi.  Það snýst allt á Íslandi um peninga orðið....ef þú átt ekki nóg af þeim ertu aumingi -> Kapitalismi!

[haraldurhar, 8.5.2007 kl. 18:07]

Sæll Sigurður.   Þú hefur sjálfsagt verið mikivirkur í menntamálum þjóðarinnar, og fært þau öll til beti vegar.

    Eg lagði fyrir þig spurningu í gær, sem ég óska aftur eftir svari frá þér.

    Spuringin er eftirfarandi:   Var stuðningur þinn við Fjölmiðlafrumvarpi  bara í gríni?

[Auðun Gíslason, 8.5.2007 kl. 18:17]

Og Sjálfstæðisflokkurinn treystir ekki þjóðinni, sbr. endalok fjölmiðlafrumvarpsins! Já, og afstöðu ýmisra sjálfstæðismanna til íbúalýðræðis.

[Lilja Haralds (IP-tala skráð) 8.5.2007 kl. 22:21]

Hrafnkell, ég er að klára sérnám og er á leið í meira nám í Háskólanum.  Ekki á ég ríka ættingja og ég lep dauðann heldur ekki úr skel.  Námsframboðið er gífurlega mikið og gæði kennslunnar eru mikil.  

Ég fæ ekki allt upp í hendurnar án þess að lyfta litla fingri, enda virkar lífið ekki þannig, en ef maður leggur sig fram og er duglegur, skotgengur þetta.  

Þess vegna skil ég ekki um hvað þú ert að tala og finnst þú vera að lýsa allt öðru kerfi en því sem ég lifi og hrærist í.  Fólk í sambærilegu námi og mínu erlendis er að borga jafnvel hundruði þúsunda fyrir önnina á meðan ég borga 45.000 fyrir heilt ár í Háskólanum.  Ef ég vildi, gæti ég tekið allt B.S.-námið í fjarnámi án aukakostnaðar, sem verður að teljast með ólíkindum gott og er kostur sem vandfundinn er annars staðar.   

Viltu virkilega meina að ég sé bara í afneitun? 

[Inga Lára Helgadóttir, 8.5.2007 kl. 22:51]

Mikið að góðum möguleikum eru í boði fyrir þá sem eru á leið í nám. En ég verð að segja eins og er að það fer mikið eftir aðstæðum einstaklinga hvort þeir komast í nám eða ekki, og það er svolítið leiðinlegt að sætta sig við það. ÉG tel það vera vegna stöðu námslána. Annars tel ég ykkur hér að ofan hafa ýmislegt rétt fyrir ykkur, bæði Lilja og Hrafnkell

[Arnar Guðjónsson (IP-tala skráð) 9.5.2007 kl. 06:51]

Já, þú segir nokkuð Lilja. Ég er í sérnámi í virtum háskóla í Danmörku og ekki borga ég krónu fyrir það. Ég þarf ekki að borga krónu í dagvistun fyrir börnin mín, því það er tekjutengt og námslán eru ekki álitin sem tekjur eins og á Íslandi. Þar af leiðandi fæ ég líka hærri húsaleigubætur. Ég fæ aukabarnabætur sem er sérstaklega ætlað barnafólki í námi og fl. og fl.

Auðvitað þarf að hafa fyrir hlutunum til að ná árangri, en að auðvelda fólki að stunda nám er ekki ókostur. Öll höfum við mismunandi reynslu og skoðanir á þessu en þetta er mín afstaða.

[Jónas Tryggvi Jóhannsson, 9.5.2007 kl. 09:48]

Af hverju tekur Sigurður Kári ekki þau skólastig sem snúa að ríkinu og sýnir samanburðinn á þeim! Ríkið sér um framhaldsskólann og háskólana, á meðan sveitarfélögin sjá um grunnskólana og leikskólana. Staðreyndin er sú að á framhaldsskólastiginu er ísland í 16 sæti af 30 OECD þjóðum, og á háskólastíginu í 21 sæti af 30 í framlögum til menntamála! Það er metnaður sveitarfélagana sem hífir okkur upp á nær topp OECD í framlögum til menntamála per einstakling, og á toppinn ef miðað er við þjóðarframleiðslu.

Þetta sýnir bara hvað þið í Sjálfstæðisflokknum eruð ótrúlega duglegir að taka hluti úr samhengi; afhverju sýnir þú OECD samanburð á öllum skólastigum en ekki bara þeim sem ríkið hefur umsjón með? Ertu að gorta þig af afrekum R-listans sem einsetti grunnskólana og endurreisti leikskólakerfið í Reykjavík?

Menntun og rannsóknir eru mikilvægustu fjárfestingar fyrir Ísland, og þegar það er verið að gagnrýna metnaðarleysið í Sjálfstæðisflokknum þá er auðvitað ekkert verið að segja að allt sé í ólagi. Það er hinsvegar mjög sorglegt að HÍ sé svona fjársveltur og að eina lausnin sem Sjálfstæðisflokkurinn sér við þeim heimabakaða vanda sínum eru skólagjöld.  

Skoðanakannair sýna að næstum 30% af þjóðinni treysta þingflokki Samfylkingarinnar fyrir stjónun landsins.. í síðustu kosningum munaði innan við 3% á X-D og X-S, og það gæti orðið eitthvað svipað núna. Fúlt að sjá þig leggjast svona lagt í að reyna koma höggi á hana og Samfylkinguna.

[Jónas Tryggvi Jóhannsson, 9.5.2007 kl. 09:50]

Þar sem 'hana' er Ingibjörg Sólrún :)