Halldór Ásgrímsson ítrekar hug sinn til ESB

Halldór Ásgrímsson, fyrrverandi forsætisráðherra og formaður Framsóknarflokksins, birtist nokkuð óvænt í viðtali við Stöð 2 í kvöld.  Í viðtalinu ræddi Halldór um samstarf Norðurlandanna á ýmsum sviðum en jafnframt tjáði Halldór sig um Evrópusamstarfið og EES-samninginn.

Í viðtalinu kom fram sú skoðun Halldórs að hann teldi EES-samninginn staðnaðan og að ljóst væri að hann myndi ekki duga til framtíðar.  Auk þess fann Halldór EES-samningnum það til foráttu að almennt væri mönnum ókunnugt um tilvist hans.  Var ekki hægt að skilja orð fyrrum formanns Framsóknarflokksins öðruvísi en svo en að hann bæri þá von í brjósti að Ísland færi að halla sér nær Evrópusambandinu en núverandi stjórnvöld hafa viljað gera.

Það þarf svo sem ekki að koma á óvart að Halldór Ásgrímsson tali með þessum hætti um hugsanlega aðild Íslands að Evrópusambandinu.  Á síðari hluta síns stjórnmálaferils síns fór hugur hans að leita frekar í átt að Evrópu en áður hafði verið.  Svo heitur var Halldór raunar orðinn í afstöðu sinni til aðildar Íslands að Evrópusambandinu að hann setti fram þann spádóm á Viðskiptaþingi Viðskiptaráðs, meðan hann gengdi embætti forsætisráðherra, að Ísland yrði orðið aðili að sambandinu árið 2015.

Stefna Halldórs Ásgrímssonar í Evrópumálum sem formanns Framsóknarflokksins var flokknum dýrkeypt.  Þó svo að Halldór hafi undir það síðasta verið orðinn heitur Evrópusinni, þá fylgdi grasrótin í flokknum honum ekki að málum.  Hún var sammála Guðna Ágústssyni, varaformanni, að málum, en Guðni hefur alltaf verið harður andstæðingur aðildar.

Mér er hins vegar hulin ráðgáta hvað það var sem knúði Halldór til þess að fara í viðtalið, nú nokkrum dögum fyrir alþingiskosningar, og ræða með þessum hætti um Evrópusambandsaðild.  Framsóknarflokkurinn hefur frá því Jón Sigurðsson tók við formennsku í flokknum frekar verið að færast frá stuðningi við Evrópusambandsaðild.  Í ljósi þess fæ ég ekki séð að það komi Framsóknarflokknum til góða að Halldór sé nú, skömmu fyrir kosningar, að tala með þessum hætti um Evrópumál, enda hafa þau sjónarmið sem hann hefur haft fram að færa í þessum málaflokki ekki verið til þess fallin að afla flokknum vinsælda.

En úr því að Halldór Ásgrímsson taldi það EES-samningnum til foráttu að almennt væri mönnum ókunnugt um tilvist hans, þá er rétt að halda því til haga að frægð EES-samningsins hefur enga þýðingu í þessu sambandi.  Það sem máli skiptir er hvort EES-samningur hafi þau réttaráhrif sem til er ætlast .

Eftir því sem mér er best kunnugt hefur EES-samningurinn ennþá þau réttaráhrif sem til var ætlast þegar undir hann var ritað og tryggir Íslendingum því sömu mikilvægu réttindi og áður á hinu Evrópska efnahagssvæði.

Og á meðan samningar eru í gildi og hafa réttaráhrif sem slíkir er furðulegt að halda því fram að þeir séu staðnaðir.  Annað hvort eru þeir í gildi eða ekki.  Það segir sig sjálft.

Sigurður Kári.

 

 

Athugasemdir

[Guðrún María Óskarsdóttir., 1.5.2007 kl. 02:42]

Sæll Sigurður Kári.

Tek undir það að koma Halldórs nú í viðtal vegna þessa er afar illa skiljanleg.

kv.gmaria.

[Hjörtur J. Guðmundsson, 1.5.2007 kl. 15:30]

Góður að vanda! Og velkominn á bloggið félagi ;)

[Jóhann (IP-tala skráð) 1.5.2007 kl. 18:09]

Þetta er ekki svona einfalt. Ég hef hvað eftir annað lent í endalausu stappi við bjúrókrata því þeir hafa ekki vitað af tilvist EES. Þetta hefur kostað mig mikinn tíma og peninga því þetta gerist trekk í trekk þegar maður reynir að stunda viðskipti á meginlandinu. Manni er alltaf vísað á annan bjúrókrata og jafnvel enn lengra áður en réttaráhrifin nást í gegn. Skilvirkni skiptir máli í viðskiptum og núverandi ástand er engan veginn nógu gott.

[Hjörtur J. Guðmundsson, 1.5.2007 kl. 21:41]

Jóhann:
Mér sýnist nú á þessu að vandamálið sé ekki EES-samningurinn sem slíkur heldur skriffinskan innan Evrópusambandsins sem við aftur myndum flytja inn í heild sinni ef við gengjum í Evrópusambandið.

[Jóhann (IP-tala skráð) 2.5.2007 kl. 02:21]

Nei Hjörtur. Málið er að við Íslendingar höfum sama lagalega rétt eins og þegnar ESB ríkjanna en það er bara ekki þannig í praxís. Skriffinnskan er ekkert meiri í ESB en hérlendis. T.d. get ég flutt búslóðina mína milli ESB landa en svo þegar ég ætlaði að flytja hana heim þá þarf ég að borga aðflutningsgjöld af öllu sem ég hef átt skemur en í 1 ár, svo dæmi sé tekið.

 Það að ESB skuli vera eitt efnahagssvæði þýðir í raun enga skriffinnsku þegar fólk flyst milli landanna. Þjóðverji má opna bankareikning í Frakklandi án mikilla vandræða og það gengur vandræðalaust í praxis. Sömu réttaráhrif eiga að gilda um okkur Íslendinga en það kostar blóð, svita, peninga og tár að ná því í gegn. Í hvert einasta sinn sem maður ætlar að gera eitthvað á borð við að opna bankareikning þar maður að tala við nokkra yfirmenn og fræða þá um tilvist EES sem þeir þurfa síðan að fá staðfest annars staðar.